Түркістанда өткен халықаралық инвестициялық форумда 300-ге жуық компания басшылары мен инвесторлар жиналды. Форумның негізгі мақсаты – аймақтың инвестициялық және туристік әлеуетін арттыру, өңір экономикасын әртараптандыру, сондай-ақ шетелдік жетекші компаниялармен іскерлік байланыстарды нығайту. Шара барысында көрме ұйымдастырылып, өңірдің қолөнер бұйымдары, туристік нысандары мен ауыл шаруашылығы өнімдері таныстырылды.
Инвестициялық меморандумдар мен жобалар
Форумда 432,2 миллиард теңгеге 7 меморандумға қол қойылды. Бұл меморандумдар «Қазақстан-Қытай» индустриалды аймағын құру, джинс матасын өндіру, халықаралық текстиль орталығын құру және күн панельдерін өндіру сияқты жобаларды қамтиды. Түркістан облысында 2025-2028 жылдар аралығында 111 инвестициялық жобалар пулын қалыптастыру жоспарланған, бұл жобалардың іске асырылуы 23 915 жаңа жұмыс орнын ашуға мүмкіндік береді.
Форумға Түркістан облысының әкімі Нұралхан Көшеров қатысып, өңірдің инвестициялық әлеуеті мен мүмкіндіктерін баяндады. Ол шетелдік инвесторларға өңірде дайын инфрақұрылымы бар ғимараттарды ұсынатын индустриалды аймақтар мен шағын өнеркәсіптік парктердің бар екендігін атап өтті. Сонымен қатар, биыл 58 инвестициялық жоба қолға алынып, 8 250 тұрақты жұмыс орны ашылуы жоспарлануда.
Форум аясында мемлекеттік органдар, бизнес және халықаралық ұйым өкілдері арасында пікірталас өтті. Түркістан облысындағы аудан, қала әкімдері келіссөздер жүргізіп, инвестициялық мүмкіндіктерді талқылады. Соңғы 20 жылда елімізге Қытайдан тартылған инвестициялардың жалпы көлемі 27 миллиард АҚШ долларын құраған, ал Түркістан облысында Қытай капиталының қатысуымен 165,5 миллион АҚШ долларын құрайтын 7 инвестициялық жоба іске қосылған.
Форумның нәтижесінде облыстың капиталына 1 178,4 миллиард теңге көлемінде инвестиция тартылған. 2025 жылға дейін 475 миллион АҚШ доллары көлемінде тікелей шетелдік инвестициялар тарту индикаторы бекітілген, ал II тоқсанның қорытындысымен тікелей шетелдік инвестициялар көлемі 543,5 миллион АҚШ доллары болып, жылдық жоспар артығымен орындалды.
