2026 жылдың 1 қаңтарынан бастап Қазақстанда мемлекеттік жәрдемақылар мен зейнетақылардың мөлшері 10%-ға ұлғайтылатын болады. Бұл өзгерістер ҚР Ұлттық Банкі белгілейтін инфляцияның болжамды деңгейіне негізделеді. Базалық зейнетақының ең төменгі мөлшері 35 596 теңгеден 60 005 теңгеге дейін өседі, ал жәрдемақылар да артады.
Зейнетақылар мен жәрдемақылардың жаңа мөлшері
2023 жылдан бастап, Мемлекет басшысының тапсырмасы бойынша, ең төменгі базалық зейнетақыны ең төменгі күнкөріс деңгейінің 70%-ына дейін, ал ең жоғарғысын 120%-ға дейін жыл сайын кезең-кезеңімен арттыру жоспарланған. Мысалы, 2026 жылдың 1 қаңтарында зейнеткердің бюджеттен алатын зейнетақысының мөлшері 192 816 теңгеге дейін жетеді, оның ішінде базалық зейнетақы 60 005 теңгеге, ынтымақты зейнетақы 132 811 теңгеге тең болады.
Мемлекеттік жәрдемақылардың ұлғаюы
2026 жылдың 1 қаңтарынан бастап мемлекеттік жәрдемақыларға да өзгерістер енгізіледі. 1, 2, 3 бала туғанда берілетін жәрдемақы 149 416 теңгеден 164 350 теңгеге дейін, ал 4 және одан да көп бала туғанда – 247 716 теңгеден 272 475 теңгеге дейін артады. Көпбалалы отбасыларға берілетін жәрдемақылар да бала санына байланысты ұлғайып, 4 баласы бар отбасылар үшін 63 030 теңгеден 69 330 теңгеге, 10 баласы барларға 157 280 теңгеден 173 000 теңгеге дейін артады.
Мүгедектігі бар адамдарға арналған жәрдемақылар
I, II, III топтағы мүгедектігі бар адамдарға арналған жәрдемақылар да өседі. Мысалы, I топтағы мүгедектігі бар азаматтарға жәрдемақы 101 702 теңгеден 111 872 теңгеге, II топтағыларға 81 362 теңгеден 89 498 теңгеге, III топтағыларға 55 474 теңгеден 61 021 теңгеге дейін артады. Сонымен қатар, Мемлекеттік әлеуметтік сақтандыру қорынан (МӘСҚ) төленетін асыраушысынан айырылу және еңбек ету қабілетінен айырылу бойынша төлемдер де 10%-ға көтеріледі.