Ақтөбе облысында жастарды қолдау жөніндегі жол картасы бекітілді. Облыс әкімінің төрағалығымен өткен жиында 2025 жылы жастармен жүргізілген жұмыстардың нәтижелері мен алдағы кезеңдегі жоспарлар қаралды. Мемлекет басшысының тапсырмасына сәйкес, өңірде жастарды жан-жақты қолдау мақсатында нақты міндеттер мен шаралар әзірленді.
Жастарды жұмыспен қамту және білім беру
Жастар саясаты мәселелері жөніндегі басқарма басшысы Әлімбек Тұралиевтің айтуынша, биыл жастардың қоғамдық-саяси үдерістерге қатысу үлесін 37 пайызға дейін арттыру жоспарлануда. Бұл мақсатта қоғамдық кеңестер мен мәслихаттар құрамына жаңа жас өкілдер енгізіліп, мемлекеттік қызметке 50 жас маман қабылданады. Сонымен қатар, 20 мыңнан астам жас "Ақтөбе жастары" бағдарламасы, бизнес-идеяларды іске асыруға арналған гранттар және "Дипломмен ауылға!" жобасы арқылы қолдауға ие болады.
Жұмыссыз жастармен жұмыс
Жұмыспен қамту мәселесіне баса назар аударылып, жыл ішінде 15 мыңнан астам жасты жұмыспен қамтамасыз ету жоспарлануда. "Бастау бизнес" жобасы мен онлайн-оқыту бағдарламалары аясында білім беру көзделген. Жұмыссыз жастар үшін тағылымдамалар, кәсіби оқыту және олардың санын 1 000 адамға дейін азайтуға бағытталған жобалар қарастырылған.
Шамамен 190 мың жас ұлттық құндылықтарды дәріптеу шараларымен, 110 мыңнан астамы спорттық бағдарламалармен, ал 7 мың жас еріктілік қызметімен қамтылатын болады. Жастар шығармашылық жобалар мен инкубациялық бағдарламаларға, соның ішінде "IT Hackathon – 2026" және "Aqtobe Hub Youth Incubation Program" жобаларына қатысады. Жол картасының іске асырылуын бақылау мақсатында 2026 жылғы 20 қаңтардан бастап әкімдіктердің жұмысын бағалауға арналған KPI жүйесі енгізілетін болады.
Облыс басшысы жоспарланған шаралардың орындалуына қатаң бақылау жүргізу қажеттігін атап өтті. "Жасыл ел" жобасы бойынша жұмыстардың басталу мерзімін қатаң бақылап, жастарды толық көлемде жұмыспен қамтуды тапсырды. Жұмыссыз жастармен жұмысты күшейту және барлық іс-шараларды нақты мониторингпен сүйемелдеу маңызды болып табылады.
